PALM SUNDAY

Tiwala lang Kapatid... Malapit Na! 

By Br. Paulo Sillonar, OP

Ako ay isang seminarista. Ako ay isang Dominikong seminarista. Ako ay tao rin na kagaya mo – nahihirapan, nasasaktan, nakararanas ng mga pagsubok at problema. Ako ay hindi kaiba sa iyo. 

Sa loob ng anim na taon kong pamamalagi sa seminaryo, hindi ko mapigilang tanawin muli ang aking mga karanasan at tingnan ang aking katayuan ngayon. Maraming mga bagay ang nangyari simula nang naisipan kong pumasok sa seminaryo; naranasan ko nang mapagtawanan, mapagalitan, mahirapan at umasa. Ito ay ilan lamang sa mga pagsubok na aking naranasan at napagtagumpayan. Kaya naman kapag naaalala kong mga pagsubok na dumaan sa aking buhay at ang mga pagkakataong inakala kong hindi ko kaya, napapangiti na lamang ako. Akala ko, hindi ako makakayang lampasan ang mga pagsubok na iyon, pero nagkamali ako. Nalampasan ko ang mga iyon at napagtanto ko na walang imposible kapag nagtitiwala tayo sa Diyos. 

Kaya naman sa panahon ng Kuwaresma, ang ating ebanghelyo sa Linggong ito (Palm Sunday of the Lord’s Passion) ay nagpapaalala sa atin na kapag nakararanas tayo ng mga pagsubok sa ating buhay, kailangan lamang nating harapin ito at magtiwala sa Diyos kagaya ng ginawa ng ating Panginoong Hesukristo. Noong siya ay nakaranas ng paghihirap, kanya itong tinanggap at hinarap dahil alam niyang kasama niya ang Diyos. 

Mga kapatid, isa lamang sa mga patunay ang ebanghelyo sa linggong ito na tayo ay makakaranas ng paghihirap. Ngunit ito ay hindi magtatagal. Kaya tiwala lang kapatid. Malapit na ang Linggo ng Pagkabuhay. Sabay-sabay natin itong salubungin nang may galak at tuwa sa ating mga puso.