1st SUNDAY OF LENT

MALING AKALA

Br. Mervin G. Lomague, OP

May isang ibon na napagod sa isang paglalakbay. Gusto niya sanang kumain pero hindi siya nakuntento sa prutas na nakukuha niya sa mga puno. Gusto niya pa sanang kumain ng mas masarap pang pagkain: Gusto niya ng bulate.

“Bulate ba kamo?” Narinig ng pusa ang gustong kainin ng ibon. “May alam akong pwedeng pagkuhanan ng mga bulate. Gusto mo, bigyan kita?”

“Eh anong kapalit?” tanong ng ibon. “Di naman masyadong mabigat. Bigyan mo lang ako ng balahibo mo.” Di makapaniwala ang ibon. Isang balahibo para sa isang bulate? Aba, “special offer” iyan! 

Pumayag ang ibon sa alok ng pusa. At di nga siya binigo nito. Di natapos dito ang pag-uusap nila. Naulit-ulit pa ito. Araw-araw. Linggu-linggo. Ito ay sa tuwing natatakam ang ibon sa pagkaing bulate na handog ng pusa. 

Hanggang sa isang araw, noong nagkita uli sila ng pusa, napansin ng ibon na hindi na siya makalipad pauwi. Dahil ito sa pagkakaubos ng balahibo niya, lalo na sa bandang pakpak. Ngumiti ang pusa at natanto ng ibon na nasa panganib siya. Pero huli na ang lahat. Hindi na kailanman nakita uli ang ibong iyon. 

Kapatid, ang tukso ng bisyo, pakikiapid, panloloko, kurapsyon at kung anu-ano pa ay ganyan kung gumalaw. Akala natin nakikinabang tayo. Akala natin walang mawawala sa atin kung papatulan natin ito. Pero nagkakamali tayo. Sa bandang huli, kakainin din tayo ng sarili nating kagagawan. Kaya naman sa ebanghelyo, napakasimple ng imbitasyon ni Hesus: Talikuran natin ang nakagawiang masama at maniwala sa Ebanghelyo. Dahil kung magpapadala tayo sa tukso, kakainin lang tayo ng demonyong tayo din ang may kagagawan.

6th SUNDAY IN ORDINARY TIME

LUMAPIT KA!

Br. Jerone R. Geronimo, OP

Kahapon lamang ay ipinagdiwang natin ang “Araw ng mga Puso”. Sigurado akong naging saksi ang karamihan sa atin sa mga magkasintahang nagde-date, mag-anak na namamasyal, magkakaibigang nagdidiwang. Love is in the air.

Subalit, alam kong hindi lingid sa ating kaalaman na may mga taong hindi makapagsaya sa araw na ito. Magpasahanggang ngayon ay may mga taong itinuturing ang sariling bigo sa pag-ibig. Maaring sila iyong mga iniwan ng minamahal, mga humahanap ng pagpapatawad at pagtanggap, mga pinagkaitan ng hustisya, mga naulila at iba pa.

Ang ketongin sa ating ebanghelyo ngayon ay isa ding bigo sa pag-ibig. Walang nais lumapit sa kanya. Itinuturing na isinumpa. Walang kaibigan, walang nagmamahal. Subalit ang ketonging ito ay hindi nagpaka-bitter habambuhay. Alam niyang dapat mag-move on. At alam niya kung kanino lalapit- kay Hesus. Nanalig siya na mapagmahal at maawain ang Diyos, kaya naman siya ay minahal at kinaawaan din.

Mga kapatid, pinapaalaala sa atin na kung nakakaranas tayo ng iba’t ibang uri ng kabiguan sa pag-ibig, nandiyan si Hesus. Hindi Siya mahirap hanapin. Lagi natin Siyang kasama. Maaasahan! Ang Kanyang puso ay bukas para sa lahat. Oo, ka-close Niya ang mga mabubuti at nabubuhay sa kabanalan. Subalit inaabot Niyang pilit ang mga makasalanan, mga may kapansanan, higit lalo sa mga bigo sa pag-ibig. Kapatid, nandiyan na Siya, hinihintay ka lang niyang lumapit. At kung sakaling matagpuan mo Siya, ilapit mo din naman ang iba sa Kanya.

5th SUNDAY IN ORDINARY TIME

INSTRUMENTS OF HEALING

Br. Roberto Castellano, Jr., OP

They say that healing of body and soul is always a grace. Since it is a grace, it must be built upon one’s nature. We cannot be healed if we will not do our part. Simon’s mother in law was healed because of Simon's prayer. That and her cooperation with Jesus paved the way for her healing. One of my close relatives who has been suffering from lung edema for years was almost giving up on life because of his ailment. He said that for years he had been struggling financially because no one was supporting his medication. After two years, I was surprised seeing much healthier. When I asked him what he had done he told me of three simple things: fervent prayers, positive attitude and a healthy lifestyle. These three simple things are the message of the gospel today. Those people who have physical defects or are possessed by devils will not be healed without their fervent prayers , healthy lifestyle and positive attitude towards their sickness. Christ, the divine physician can only do miracles if we will it and we work for it. One unique element that Jesus is trying to show us is “We ourselves can be an agent in the healing of others by our mere presence.” The power of presence always manifests the essence of our utmost love to the sick we visited.

4th SUNDAY IN ORDINARY TIME

NARIRINIG MO BA ANG DIYOS?

Br. Jose Laureano de Jesus, OP

Narinig mo na ba ang Diyos? Sa unang pagbasa ngayon, nabanggit kung gaano nakakapanindak ang marinig ang boses ng Diyos. Sabi nga ng Israelita, “Natatakot akong mamatay!” Dahil doon, nakikipag-usap na lamang ang Panginoon sa kanila sa pamamagitan ng mga propeta. Sa ikalawang pagbasa naman, nalaman natin kung gaano kahirap magsilbi sa Diyos dahil maraming umaagaw ng ating pansin sa pakikinig sa Kanyang kagustuhan. Kaya nga sabi ni San Pablo, pinakamainam hindi mag-asawa kung gustong maglingkod sa Diyos. 

Sa ating hangad na maging mabuting Kristiyano, gusto nating marinig ang tinig ng Diyos. Ngunit may problema tayo: hindi natin diretsahang maririnig ito – mamamatay tayo kung ganoon! At maraming makamundong bagay na umaagaw sa ating pansin. Sana nandito si Hesus na puno ng awtoridad habang nagtuturo sa mga tao! Kanino ba tayo lilingon ngayon? Nakakalito rin dahil marami ngayon ang nagsasabing naririnig nila ang tinig ng Diyos. Mag-ingat tayo! Gamitin natin ang puso’t isipan. Kadalasan ang Diyos ay bumubulong lamang sa ating puso, “God of silence” ika nga. At binigyan Niya tayo ng isip upang mangilatis ng bagay-bagay. Higit sa lahat, isinugo Niya ang Espiritu Santo upang tayo ay tulungan. Huwag nating kalilimutang hingin lagi ang gabay ng Kanyang Espiritu nang sa gayon, mapakinggan nating mabuti ang Tinig ng Diyos.