The God who seeks (LAGING HAHANAPIN KA)

Marami ka na bang NAWALA? Tiyak ako na ang lahat sa atin ay nakawala na ng mga bagay. Kung babalikan nga natin ang mga pangyayaring ito ay mapapangiti na lamang tayo. Andyan yung nakalimutan mo yung payong mong dala sapagkat hindi na umuulan noong pauwi ka na o kaya naman hindi ka makapasok sa bahay ninyo sapagkat hindi mo alam kung saan mo huling iniwan ang susi mo. Hindi rin siyempre magpapa­huli ang mga nawawalang dokumento at mga papeles sa cabinet o drawers natin. Lahat ng mga ito nagbigay ng kaba, pag-aalala at lung­kot sa atin. Di ko tuloy maiwasan na balikan ang aking karanasan noong ako ay bata pa. Ako ay mayroong laruan, Michael Angelo ang pangalan niya, isa siyang Teenage Mu­tant Ninja Turtle (sikat kasi noong 90s ang grupong iyan). Paborito ko iyang laruan na iyan kaya naman siya ang lagi kong nilalaro noong ako ay bata pa. Subalit ng isang araw ay bigla na lamang itong nawala, naiwan ko kasi sa may labas ng bahay namin sa tabi ng isang drum na puno ng tubig. Doon ko kasi pinaglalaruan si Michael Angelo. Hinanap ko siya at talaga naman hinahap ko siya ngunit hindi ko siya matagpuan. Nalungkot ako, kasi wala na ang paborito kong laruan. Kahit madami pa rin akong laruan noong mga pana­hong iyon at ang iba dito ay di hamak namang mas maganda pa kaysa sa laruan kong si Mi­chael Angelo subalit siya pa rin ang hinah­anap ko. Sa katunayan po hanggang sa mga panahong ito hindi ko pa po siya nakikita.

Ang ating Ebanghelyo sa Ling­gong ito ay nagsalaysay ng tatlong pa­rabola na kung saan sila ay mayroong pag­kakapareho, MAY NAWAWALA! Nawala yung barya nung babae, nawala yung isang tupa, at ang pagkawala ng isang alibug­hang anak. Lahat ng iyan NAWAWALA!

Kung may nawawala, eh di dapat may maghahanap! Mali po tayo dyan dahil hindi naman sa lahat ng pagkakataon kung may nawawala ay atin ding hinahanap. HINA­HANAP MO LANG ANG MGA MAHALA­GA SA IYO. At iyan ang gustong ipakita sa atin ng Ebanghelyo sa araw na ito - kung gaa­no tayo kahalaga sa Panginoon. Kung tutuusin mas marami pa rin ang siyamnapu’t siyam (99) sa isa (1) subalit handang iwan ng ating Panginoon ang mga ito para lamang hanapin ang sa isang mahalaga. Tayo, bilang tao ay palagi na lang nawawala at lumalayo sa Diyos subalit sigurado ako, dahil mahalaga ka para sa ating Diyos, LAGING HAHANAPIN KA.

(September 15, 2013 Sunday Gospel Reflection)