A REAL CHRISTIAN

Lalaki: Ibibigay ko ang lahat sa’yo, maging buhay at kaluluwa ko, sagutin mo lamang ako aking giliw. Mahal na mahal kita. (habang humuhuni ng magandang awitin ang mga ibon sa puno ng aratilis)

Babae: O sige aking irog, I take your word for it… sinasagot na kita. (nagbablush ang pisngi)

(Paglipas ng maraming buwan, nagsawa na si lalaki kay babae at nakatagpo na ng bagong mamahalin…)

Babae: (habang umiiyak) Totoo bang makikipaghiwalay ka na sa akin? Matapos kong ibigay sa’yo ang aking pag-ibig, iiwan mo lamang ako. Akala ko ba’y ibibigay mo sa akin ang ‘yong buhay at kaluluwa, sagutin lamang kita?

Lalaki: (habang nakangisi at naka-peace sign) hehehe, joke lang yun….

Sa mga pagkakataong naiipit ang isang tao at hindi niya kayang sagutin ang mga katanungang ibinabato sa kanya tungkol sa mga bagay na kanyang nasambit at naipangako, ang malimit na pangtakas na kanyang idinadahilan ay nagbibiro lamang siya nung mga pagkakataong iyon. Madalas ay nakakainisan natin ang mga ganitong sagot dahil para bang hindi tayo siniseryoso ng taong may ganitong pag-uugali, na para bang ang lahat para sa kanya ay biro-biro lamang.

Sa ating ebanghelyo, hinihingi ni Hesu- Kristo sa kanyang mga tagasunod ang buong buhay na pagsunod sa kagustuhan ng Diyos. Ang ibig sabihin, para sa ating mga Kristiyano, hinihingi ng Diyos ang ating commitment. At ang pagsunod na ito ay hindi biro-biro lamang.

Lubhang napakahirap maging isang Kristyano. Biruin mo, sinabi ni Hesus na mahalin natin ang ating mga kaaway. Joke ba yun? Makita mo pa nga lang ang taong kinaiinisan mo ay gusto mo na syang tirisin. Sabi pa ni Hesus, kapag binato ka ng bato, batuhin mo sya ng tinapay. Hello... Ang sakit kaya tamaan ng bato, hahampasin ko na lang sya ng french bread para medyo matigas. Ang hirap nito di ba? Pero ito ay hamon sa atin ng Panginoon. Ang pagiging tunay na Kristyano ay isang pagtupad sa pangako nang sa ganun ay atin ding matanggap ang pangako ng Diyos na buhay na walang hanggan.

Ang tunay na Kristyano ay tapat sa kanyang sinumpaang pangako. Madaling sabihin ngunit lubhang napakahirap gawin. Pero kung tayo ay tunay na committed sa ating buhay Kristyano, pagsusumikapan nating maging isang tapat na alagad ng ating Panginoon. Ang pagkamatay ni Hesus sa krus ay hindi isang biro, binigay nya ang kanyang buhay para sa atin. Kaya naman nararapat na maging tapat tayo sa kanya, at hindi dapat joke lang.